情人節男人例牌會送花，通常女人把口會話好老土，但如果收唔到，又會暗啞底話個男人老鬼土。美聯新紮住宅部行政總裁伍創業就好識做嘞，趁噚日第一日進駐美聯中環總部，又咁啱撞正初七人日咁好日，向大班美聯後勤女同事送花兼賀年，希望有情人終成眷屬，順便講聲大家好。
買貨尾抽獎遊泰國
其實，美聯今年都真係幾識做，好似佢哋幫華懋賣緊嘅陳年貨尾沙田碧濤花園，同埋青山公路豪景花園，趁住情人佳節，以情人或夫婦名義買單位，就有機會得到價值萬幾銀嘅雙人5日泰國旅遊，名額得3個。
買層樓當情人節禮物，雖然有啲誇張，不過，如果真係過晒鮮花糖果嘅拍拖蜜糖期，真金白銀兼具升值潛力嘅禮物，喺呢個負利率年代，睇怕都唔會俾人話老土兼核突。