情人節好多有情人都忙住送花收花、食飯慶祝；不過，小小超李澤楷似乎公私兩忙，分身不暇。呢幾日先有傳媒報道，楷楷嘅混血兒女友Rachel（羅愛欣）話情人節會去旅行，仲暗示係同楷楷一齊去，點知楷楷慶祝情人節時不忘工作，噚日透過電盈（008），宣佈私有化盈大地產（432）嘅大計。
2000年鯨吞香港電訊
楷楷似乎特別鍾意喺情人節先嚟搞大動作，好似2000年盈動迫退新加坡電信，鯨吞香港電訊呢單轟動一時嘅事件，就發生喺情人節前後。人哋新加坡電信提親在先，你盈動搶親後發先至，人哋梗係唔開心。所以嗰年嘅情人節，即使楷楷正同當年嘅「盈科之花」Karen（林慧儀）拍拖，佢都唔敢去浪漫，而係帶住幾個高層去新加坡，向當地政府解畫𠱁番人。
8年後又再揀呢日先嚟大動作，咁下年情人節，會唔會宣佈私有化女友呢？