專門設計製造及銷售兒童產品嘅隆成集團（1225）噚日發出通告，話公司副主席兼行政總裁陳信興，噚日喺台灣因病過身，通告中冇披露陳信興患咗乜嘢病，只係好感謝佢多年嚟對公司嘅貢獻。
陳信興透過華富投資，持有隆成13.34%股權；佢太太蔡素華同個仔陳俊傑，就分別揸住華富70%同30%權益。
另外，隆成即時宣佈，委任55歲嘅楊欲富接替陳信興嘅行政總裁職位。
楊欲富舊年12月1號，先至擔任隆成執行董事；至上個月底，再做埋副主席，𠵱家身兼三職。
睇番通告，原來楊欲富喺04至06年曾經做過隆成嘅獨立非執行董事，家陣佢擁有公司700萬股認股權。