早排先影完豐田MARKXZiO，點知又收到Order，又影？原來話咁快又出咗頂級豪華六座版！今次廠方都算藝高人膽大，喺內櫳天花設置一排長燈去谷行豪華感，估佢唔到，效果又真係唔錯！
文、攝：法拉利
Model：Joanne
內櫳玩格調
乍看MARKXZiO車頭電鍍鬼面罩，有啲似古董車，但係又充滿時代感，側面睇線條流暢唔花巧，傾斜嘅C柱仲同A柱互相呼應，一氣呵成形成一條拋物線，再襯上18吋合金胎軨，非常合拍。車尾頂附置尾翼及高置煞車燈，又帶出一點辛辣跑味。打開車門，最搶嘅梗係天花頂嗰一排燈啦！呢個設計係頂級版同普通版最大嘅分別。唔好以為佢最大嘅功效只係照明，其實最重要嘅係，令成個車廂嘅氣氛同格調更顯高級。呢個獨特嘅燈箱設計由車頭開始一直伸延至中排座椅，很有線條感，襯上白色漸變燈光，出嚟嘅效果出奇地配合車廂內嘅每一項布置。四隻門嘅門板都加上大面積真皮裝飾，前排更追加一對電動座椅。咦，本來中間嘅長凳竟然變咗一對大班椅，中央仲有大手枕。手枕上除咗有兩個杯架之外仲有好多置物空間。講到最後排，兩張座椅絕對談不上舒適，只能算是後備席，不過就Fit晒小朋友，都算啱晒一般小家庭嘅要求。
紮實下盤低重心
一般豐田車嘅後軸均大至用上扭力桿尾擔，而MARKXZiO一反傳統，尾軸配上跑車常用的雙A臂懸掛設計，大大改善行車舒適感。廠方更將四支吸震筒及彈簧調校得偏向跑車化，彎路性能被大幅提升。動力方面源用2.4L的2AZ-FE引擎，配上順滑無比嘅SuperCVT-i無段變速自動波箱，不論燈位起步及轉線加速等反應都相當順滑敏捷。輕輕向油門施壓已即時應聲彈出，動力輸出雖不算力大如牛，但勝在低扭充沛，絕對適合在市區遊走，無段變速波箱的優點亦能夠在時開時停嘅市區行車中表露無遺。而車廂隔音功夫亦好到家，在一般石屎路面行駛的雜音非常少，絕對唔能夠相信此車是偏向跑車化調校。
規格表
引擎：2,362c.c.直4VVT-i
馬力：163ps/6,000rpm
扭力：22.6kgm/4,000rpm
傳動：SuperCVT-i無段變速自動波附+/-模式，前輪驅動
尺碼：4,695×1,785×1,550mm
查詢：浩偉汽車（28932880）