葉翠翠、徐淑敏（Suki）、曹敏莉、高鈞賢、司徒瑞祈（阿水）同黃長發噚日喺葵芳新都會廣場出席無綫劇集台宣傳活動，同現場觀眾玩遊戲，着低胸衫嘅翠翠玩遊戲時，唔知係咪驚走光，不時望住自己個胸，但當佢烏低身時，唔小心露出白色胸圍邊。
管理處變收禮處
事後翠翠好緊張問記者係咪影到佢走光相，佢話：「件衫新買，之前未試過着，入面只係戴咗胸圍冇打底，所以驚動作太大會走光。」
翠翠自從同李逸朗甩拖之後，就話要專心工作唔拍拖，不過佢自爆𠵱家有幾個男仔追緊佢，前日同噚日都有人送情人節禮物去佢屋企樓下，翠翠話：「噚日收到部手提電話、花，今日又收到條頸鏈，我問番個看更，佢話係由唔同男人放喺管理處，我都知係乜人送嘅，之前同幾個男仔去街，佢哋送過我返屋企，不過暫時都未搵到合心水男友，所以唔拍拖住。」
另外，Suki同阿水玩整蛋糕遊戲時，扮到好sweet咁，Suki仲將蛋糕忌廉整落阿水塊面度，阿水話下次都唔敢再同Suki影相，怕會傳緋聞，身旁嘅Suki就好風騷咁祝阿水話：「我祝你情人節搵番個好嘅。」