【淫照風暴之小心出入】淫照風波男主角陳冠希（Edison）、女主角鍾欣桐（阿嬌）、張栢芝和陳文媛等連日來登上各大報章雜誌的頭條新聞，事件震撼整個香港，阿嬌日前公開露面，自稱「好天真、好儍」，陳冠希將於日內回港召開記者會，張栢芝和陳文媛則一直未有回應。圈中藝人對事件持不同態度，好姨薛家燕認為阿嬌應提醒年輕人「唔好似自己一樣犯錯」作為警惕，陳慧嫻則提議Edison回港時，要請多幾個保鑣。採訪：林風
陳慧嫻：令人尷尬
我唔係佢（Edison），唔知佢做過乜，如果佢返嚟就請多幾個人保護啦。（有否聽聞過江湖暗殺令？）我唔知係咪喎，做呢啲事令好多人尷尬，如果佢有必要返嚟，或者有人認為佢要返，就要請多幾個保鑣保護自己。
薛家燕警惕青年
阿嬌講漏咗一樣，就係提醒年輕人唔好似自己一樣犯錯，作為警惕。男歡女愛本來好平常，但公眾人物必須注意對自己同公眾嘅影響。呢個事件影響一生，對配偶、家庭，子女都好難解釋，又影響大家對演藝圈嘅睇法，身為藝人要注意自己嘅身份，以及對社會嘅影響，呢件事無論拍攝者同被拍者都要負責。
LisaS.性愛無罪
（傳聞）MaggieQ都有份涉入呢件事之中，我覺得好惋惜，不過佢同吳彥祖分咗手好耐，都已經冇關係。阿嬌企出嚟道歉，我好尊重佢，不過其實佢無需要道歉，佢都冇做錯，每個人都有性生活，唔係一件壞事。
何超儀幾時再見
原本Edison會做我演唱會（下月2日在StarHall舉行）嘉賓，不過𠵱家佢嚟唔嚟我都唔知，隨佢啦，我都唔知佢幾時返，都唔想再評論呢件事，唔夠膽講啲乜嘢，亦都唔想煩佢。
方力申再夥阿嬌
唔想再就事件加入意見同評論，我當然支持佢（阿嬌），同埋希望佢工作順利。我冇send短訊慰問阿嬌，因為大家下個月會有機會同台合作。（怎看陳冠希回港？）應該快啲返嚟啦，女仔都講咗啦。
鄧麗欣懶理批評
我冇睇過網民對阿嬌嘅批評，相信佢間公司會有適當安排。我同小方喺新戲有激吻鏡頭，拍嗰時NG咗10幾次，因為邊錫邊掉衫，難度較高。