每到農曆年假，富豪高官都鍾意到外地度歲，華華收到線報，東亞（023）寶哥哥個大仔李民橋，帶住佢同前妻鷹君集團（041）太子女羅寶盈生嘅囡囡，仲有緋聞女友、莊士集團太子女莊家蕙，「一家三口」到泰國曼谷過年，仲喺大年初一齊齊食泰皇菜曬溫馨。
有朋友向華華報料（呢個唔係網友，真係華華老友），話年初一晚喺曼谷老字號嘅五星級酒店DusitThaniBangkok裏面，一間叫Benjarong嘅高級餐廳度，見到李民橋同莊家蕙，帶住個細路女撐枱腳。
出現五星級酒店
佢哋食咗啲乜？因為餐廳太暗，老友睇唔清，不過呢間餐廳以泰皇菜做賣點，加埋宮廷式嘅裝修，高貴又豪華，泰國皇室成員都有幫襯，價錢喺泰國當然唔算平，套餐最平都要250蚊港紙。
三口子過情人節
華華個friend去呢間餐廳，唔係話佢係富豪，只不過佢喺呢間酒店住，可以免費食一餐泰皇菜。究竟李民橋係自費去幫襯，定係咁啱都喺嗰間酒店住？咁華華就唔知嘞，但之後幾日，老友都冇再撞到佢哋囉。
翻查資料，李民橋同莊家蕙早喺上年11月23日，泰國水燈節（即泰國情人節）前夕，已靜雞雞拜會白龍王，唔知係咪保佑兩人感情順利呢？今日係西方情人節，莫非兩人提早拜會，希望得到白龍王嘅再一次祝福？華華都趁情人節，祝福有情人終成眷屬。
電郵：mailto:[email protected]