俄羅斯教練軒廸克順利帶領球隊打入08歐國盃決賽周，可能呢位荷蘭人以為做咗國家隊英雄，日前居然話希望去克里姆林宮見總統普京！我求大俠聽到笑到噴飯，呢位現代「沙皇」鍾意柔道，對足球就好似對自由、民主咁毫無興趣，加上近排普京忙住派轟炸機挑釁日、美兩國，又點得閑見你軒廸克啊？話說回來，軒廸克對呢位獨裁總統咁崇拜，令求大俠好失望！之前同時教澳洲同燕豪芬都算，𠵱家仲想博親近權貴，諗住做官咩？