內房股板塊噚日繼續有唔錯表現，觀塘張先生見世茂房地產（813）之前累積唔少跌幅，建議短炒博反彈。世茂噚日收報17.02蚊，升3.2%。
楊：楊慧玲沈：沈振盈
張先生：我貼世茂房地產，佢由高位回落咗兩三成，可以博短線反彈。
沈：純博反彈可以，但千祈唔好長揸，內房股喺高位回落之後吸引力大咗，不過預期宏調力度會繼續收緊。世茂有好多重點城巿嘅商用項目，比其他只賣商品樓嘅內房股穩陣，𠵱家巿盈率大約19.9倍，喺20倍樓下都可以接受。
張：現價可以入貨？
沈：世茂近日由低位反彈，𠵱家喺阻力位，可以等到15蚊先買，風險小啲又有反彈空間，可以博升2、3蚊。
張：我都係諗住博2、3蚊，止蝕定喺16蚊。
沈：止蝕定喺15蚊更好。
楊：張先生係咪跟好消息入貨？
張：報紙話佢今年有200幾億營業額！
楊：主席增持係另一個好消息，不過近排好多公司主席增持股票後都坐艇，好似玖龍紙業（2689）主席張茵咁，所以主席增持未必跟得過。
張：仲有邊隻內房股吸引？
沈：我一直都唔推介內房股，因為大家一直忽略政策風險，國家政策以長遠為題，影響長遠，唔會只顧小眾利益，內房股之中可以先考慮中國海外（688），可以睇13蚊。
楊：內房股反彈全因恒指季度檢討，傳出碧桂園（2007）有機會入藍籌，而其他內房股亦趁勢反彈。世茂亦係靚股，可趁消息炒一兩轉。
--觀塘張先生建議--
建議買入價：17.02元 目標價：20元
止蝕價：16元 時期：一個月
中國中鐵（390）
炒中鐵建影子概念
黃先生：中鐵建就快上市，怕抽唔到中鐵建，所以想趁勢炒中國中鐵（390），食影子股概念，諗住9.29蚊買入，止蝕價定喺9蚊。
楊：中鐵股價近期喺9至10蚊之間徘徊，沈大師點睇呢？
沈：9蚊左右嘅價位可以考慮，但入市策略要睇往績，中鐵由高位回落，喺8.3至8.4蚊之間有較大支持，所以黃生定止蝕位要視乎注碼多少，可以參考吓8.2蚊呢個價。
楊：中鐵建上市計劃仍然進行緊，因為呢間公司同時喺中港兩地上市，目前佢發行A股計劃等緊中國證監會審批。但從基建角度嚟睇，都有利中鐵。
沈：𠵱隻股係我未來幾年嘅首選，可以喺8.5元先入市，8蚊止蝕。
--西貢黃先生建議--
建議買入價：9.29元 目標價：11元
止蝕價：9元 時期：一個月
港交所（388）
跟政府$154買入
溫小姐：我想跟政府154蚊入港交所（388），因為政府消息靈通，佢哋都喺154蚊入，我諗住跟政府買嚟長揸。
沈：你要考慮埋另一個因素，當年政府喺個巿由萬六點跌到6000點時入巿打大鱷，嗰時好多公司估值都過低，擺幾年實升。但今次政府係歷史高位入巿，買貴咗，港交所有機會跌穿政府嘅入市位，最好要等個巿真係見底先買。
楊：政府入巿時港交所巿盈率有成100倍，當時巿場憧憬港股直通車，日日都有千幾億成交額，但係近期每日成交額縮減，𠵱家未係入巿時機，等成交額升番到1000億，先好睇吓好唔好入巿。
沈：巿況變差，港交所08年業績可能會倒退，投資者客觀分析。我自己就唔會買，亦都唔會叫人買。
--尖沙咀溫小姐建議--
建議買入價：154元 目標價：-
止蝕價：- 時期：長期
新傳媒（708）
入市要揀龍頭股
Frederick：噚日上市嘅新傳媒（708）舊年賺超過3100萬，𠵱家市值六億幾，但壹傳媒（282）舊年賺3億幾，市值有成70幾億，點解相差咁遠？我睇緊隻新傳媒，暫時未入市。
沈：壹傳媒上市已經一段時間，有唔少機構投資者持有，兼可能係長線持有，而新傳媒剛上市兼市值細，暫時未有機構投資者參與。𠵱家有不少上市嘅傳媒股，有賺錢，有蝕本，要選擇邊一間，策略好簡單，就係市場領導者，市場佔有率要大。
楊：如果要炒新傳媒，應該從炒新股概念出發，不過新傳媒股價噚日（12日）已經升超過1倍，𠵱家仲入唔入得過？
沈：經過首日放煙花（大升）之後，𠵱家要睇清楚有幾多街貨，如果要買，都要等獲利貨消化咗先，1蚊樓下可以考慮。
--銅鑼灣Frederick建議--
建議買入價：1.1元 目標價：2元
止蝕價：0.8元 時期：半年
招商銀行（3968）
$27.2溝多注
關公：今次想講招商銀行（3968），沈大師，招行係你嘅首選，所以希望你指點迷津。
沈：六行之中我係首選招行，理由有三個，首先佢唔係國有銀行，好多方面信心大啲，其次佢受宏調影響較小，而且有好多商貿貸款，仲有佢嘅業績都算交到功課。
關公：我想喺27.2至28.5蚊之間買。
沈：招行股價落到呢個價位，可以考慮吓，但我心目中有一個目標，就係挨近舊年8月17日股價水平（即25.45蚊），呢個位有支持。
關公：呢隻股我曾經喺28.5蚊時買咗一注，𠵱家再想喺27.2蚊買多一注得唔得？
沈：溝貨策略唔係咁，我認為第二注入市價係25蚊，要知道股價喺上個月跌到25蚊先反彈，所以唔使咁早溝貨。
--大埔關公個案--
買入價：28.5/27.2元 目標價：-
止蝕價：- 時期：短炒
