中國雪災，災民逾億，中南海諸公頭都大晒，政治局常委紛紛趕赴前線視察，監督救災工作，當然亦含有政治騷成份。算啦！天下領導人，遇上國家天災，莫不如此。二○○六年之紐奧爾良風災發生後，布殊總統去遲咗，俾人批評至今，政治人物豈會不吸收教訓。
雪災意外之得，係刺激股市上升，股民發一筆災難財，其中又以買中安徽海螺（水泥股）嘅股民賺得最勁，此外，國際煤價向上衝，澳洲煤價破一百美元一噸，喺二月一日升到每噸一百一十六點四四美元，睇嚟我哋每月煤氣單嘅燃料附加費一定上漲。煤價升得咁高，皆因南非幾乎日日停電，金礦煤礦停止開採，中國因雪災而緊急停止煤炭出口，故此益晒澳洲煤礦股。
○八年初如此開局，睇嚟今年啲煤炭價格看好，澳洲有大量煤炭出口，但唔夠船噃，於是專營亁散貨輪嘅船公司又會有排開心嘞。成班老友在新年前吃午飯團年。船務C講訂造一隻cape-size亁散貨輪要近兩億幾三億美元，本錢唔小。但係好多人矇查查嘅，一間華爾街大行就向一間船公司介紹話，在巴爾提摩（Baltimore）訂購同類船隻，只需一億五千萬美元。便宜咁多，美國人唔識賺錢乎？
船務C話現在除咗美國公司之外，冇人會向美國訂購輪船。美國好耐以前制訂保護美國船廠、美國船員嘅政策，以納稅人公帑，大派津貼，爭取外國訂單，故此美國船廠造船叫價，平通全球。但有條件嘅，就係新船下海後，必須掛美國旗，受美國法律管，聘請美國船員。世界上嘅船東，人人精過鬼，邊度肯接受呢啲條件吖，否則嘅話，他日美國船員罷工，用美國法律解決，營運費用會高到離譜。
美國想保護海員就業、保護造船業，結果係點？就係美國航運業失去競爭力，在世界上冇重要地位，而美國以外嘅船公司除非有必要，一定唔聘用美國船員。講真，一個極好資格與經驗嘅印度裔貨船船長，年薪兩萬美元，差啲嘅美國人船長，起碼年薪六萬美元，你話船公司會請邊個？美國保護主義一啲都保護唔到美國船員就業，只係催化美國航運造船業向下尋底。