上周放假，藍鑽石兄捱義氣幫我寫咗一期，點知都係失手，〈早飛王〉已經3場未開紅門；畢傑今周接番呢個俾蘋果波神話黑咗一排嘅專欄，我有信心周六英足盃狼隊呢個下盤，幫到我大平反。畢傑
英足盃嚟到第5圈，有場英冠球隊內訌戰，由卡廸夫城迎戰狼隊。假設今場喺聯賽相遇，五五波下，是但一邊都讓唔起對手，更何況喺英足盃呢啲咁難估、咁唔正路嘅賽事上。
卡城僅靠老將孭重飛
卡廸夫城上場聯賽對住無人駕駛嘅高雲地利（賽前領隊杜維被炒），都只能夠賽和0:0，累積近3場得1和2負，反映近期個form麻麻。至於卡廸夫城星級射手科拿繼續因傷長唞，而今季攻入7球嘅次席射手、威爾斯國腳中場列特利，又喺上場對高雲地利時傷出，周六肯定唔可以上陣。
未數完呀，卡廸夫城𠵱家前線仲係靠晒哈索賓基孭重飛，睇番呢位35歲嘅射手場場都踢唔足90分鐘，體力唔夠好正常嘅，早段射唔爆狼隊嘅話，尾段定必缺反撲力。雖然杜利華冼佳亞同史米加都可以傷癒復出，但係領隊戴夫鍾斯講明呢兩位前英超兵缺比賽狀態，周六未必會冒險派上場，整體戰力削弱。
狼隊今季聯賽曾作客贏過卡廸夫城3:2，嗰場梅開二度嘅禮利可繼續出戰外，射入奠勝球嘅卡杜克同樣已傷癒復出。此外，球隊無論前線派出那種組合，入球率依然高企；上圈英足盃作客屈福特，就是靠安廸基奧治梅開二度、史堤芬伊利洛及保夫萊特等射手的入球，以4:1淘汰對手晉級，可見鋒力較卡廸夫城更強。
總之五五波情況之下，揀受讓一方有着數，加上卡廸夫城陣容唔齊章，難讓平/半，吼實狼隊個下盤，有機會收足全格。
早飛王貼士
星期六9 卡廸夫城vs狼隊
首選：狼隊（下）
次選：入球大（2.1）
冷選：狼隊[和/客]（7.5）
《周末早飛超級重心》
紅軍大膽有「利」
星期六12 利物浦4:1班士利（15倍）
利物浦有希比亞、奧利里奧及艾比路亞等守將復出，而首席射手費蘭度托利斯同樣可復操，領隊賓尼廸斯稱下周中歐聯對國際米蘭，這名西班牙前鋒將可復出，周六更或會派落場操狀態，今面對失球偏高的班士利，博「大」膽4:1。
米堡少讓劈「錫」
星期日12 錫菲聯1:2米杜士堡（7.5倍）
錫菲聯續可排出強陣出戰，比亞堤、史廸及東治等主力全可披甲。米杜士堡近期復蘇，近7場賽事未嘗一敗，前鋒艾利亞廸里則近3戰攻入兩球，腳風頗順，目前僅餘端基、卡達莫及安德魯泰萊等傷兵，少讓平/半捧上盤。
普雷斯頓可和樸茅
星期日22 普雷斯頓2:2樸茨茅夫（15倍）
普雷斯頓守將辛列特加在上場聯賽對高車士打領紅被逐，今場英足盃需要停賽，至於近6次迎戰樸茨茅夫得4勝2和。客軍樸茅續缺守將廸斯甸、派密斯及馬田卡尼，而烏達卡及蒙達利等非洲兵已歸隊。普軍對賽往績佳，1.95倍「主勝」抵博。