公仔賣衫　熊哥一號

好久不見的EricSo，08年的第一擊不是甚麼Figure，亦不是甚麼食電影大熱的乜乜《長江７號》產品。答案竟然是衫！一些Eric覺得大家都有需要的黑沉沉低調服。不過用番他筆下的Cutie熊仔TheBear，及勵志的心心為主題，自言老套，更理直氣壯地將衫當創作品咁設計、當實驗品咁試：「係老套！但我Enjoy！」

記者：許維雅
攝影：陳盛臣

蘋果：點解突然會有出衫的念頭？為何又會用番TheBear熊仔作主題？

Eric：我其實對於衫唔係太講究，反而都係着朋友送的多。久病成醫，可能同朋友攞衫攞得多，就開始有興趣研究，覺得點解呢個位唔咁整，點樣整會更加Perfect，慢慢開始有想做衫的衝動。加上加拿大那邊有朋友兩三年前，一直要求我出一些衣服放於那邊賣，今次咁啱Papamamason想成立ApparelDivison出衫，就促成今次合作的機會。至於TheBear主題，其實02年因為幫台灣那邊出了一本故事書，就開始有呢個TheBear熊仔Character，我一直好想攞番呢個公仔出來玩，我好喜歡呢個熊仔。

■近年推出產品棄香港市場作主打，Eric坦言歐美市場大，接受能力高，商業上的遊戲規則都好現實地話你知，外國成功之後回流係會較受歡迎。

蘋果：點解會咁喜歡呢隻熊仔？

Eric：02年創作呢個Character，全因為當時社會環境氣氛唔係幾好，全部都係負面思想，我好希望用一些得意公仔、勵志故事去鼓勵人唔應該咁易放棄。個故事係講一個小妹妹有一隻新熊仔玩具，開頭就當佢係Buddy一樣，之後就掉落垃圾桶。被遺棄的熊仔從此就多了一滴眼淚的特徵，幸好遇上好心的新主人而開始另一段人生旅程。我一直想幫TheBear建立一個正面、健康的形象，等大家一遇上唔開心的事，見佢就會重新振作。

■TheBear故事書在台灣受歡迎，其後日本《BOON》再將TheBear故事書在日本發售。

蘋果：你係咪一個好樂觀的人？係咪成日有想幫人的衝動？

Eric：我悲觀定樂觀？一半一半啦，悲觀係有時覺得自己太過了解現實，都化晒喇，然而識得用平常心看事，希望可以用正面的方向去鼓勵人。買我的玩具同時會開心，會加強到佢哋對人生的積極，我會感覺到可以幫人，我幾Enjoy將呢件事攬上身。我都知玩具界SellDarkSide、賣暴力一定會容易好多，呢類鼓勵性質的玩具會感覺老套，但我唔介意，幾覺得自己係有責任咁做，幾Enjoy呢個身份。

蘋果：今次第一次出衫，你的構思係怎樣？點解款式咁少，同埋全部黑沉沉？

Eric：我唔係FashionDesigner，我只係一個用家。年紀大咗都開始覺得唔可以成日牛記笠記，有時要配合身份同場合着衫。有時想搵些亁淨、四正、成熟款式都唔易，我覺得我有咁嘅需要，其實同我咁上下年紀嘅人都會有。所以我有機會設計衫，都會以Formal、成熟為主，歐美市場都會十分容易接受呢類型款式。所以除了Tee之外，都唔會有大Logo，玩Detail為主。今次得幾件，都係以實驗性質，當創作品咁玩，設計都會比較唔正常，唔合邏輯，希望帶畀大家驚喜。

a.簡單得意的漫畫，令小女孩呢個Buddy熊仔於日本及台灣大受歡迎。

b.之後跟日本MEDICOM合作為TheBear推出Be@rbrick，隨玩具書附送，有黑、粉紅、粉藍同白四色，更有一隻特別版的灰紅色。

c.推出TheBearBe@rbrick時，以這個毛毛公仔作為包裝，唔吸引到女仔才怪，所以去貨速度極快。

今次小試牛刀的EricSo衣飾系列只有七件產品，全部都係黑沉低調款式，啱晒Eric口中有需要的成熟男士。他親自設計，由創作公司Papamamason新成立的ApparelDivison生產。其實08年秋冬將會陸續有來，將會有更完整的EricSo衣服系列推出，大家一定要拭目以待。

■今次TurnMeRedSeries，只有這件Tee印上這句Logo。

■兩件恤衫都保持低調的設計，只有領角位置有個黑色小心作點綴。

■為了添上一點有趣特色，拉鏈抽位用上大大嚿、軟腍腍的棉花料，等你有估佢唔到的驚喜。

■今日情人節會有數量極少的特別版Boxset推出，全世界只得十幾套左右，所以Eric堅持唔想介紹。「唔好介紹喇！見到就見啦！有緣見到又喜歡就買啦。」一直保持神秘，問了幾次，才透露有呢隻熊仔匙扣於Boxset內。