恭喜！恭喜！踏入鼠年第一個喜訊，就是任賢齊與女友Tina於情人節前夕，再添一名可愛兒子，為任家增多一名小成員，由於小男嬰提早一個月出世，小齊形容十分踢腳兼倒瀉籮蟹，手足無措之餘，就連入醫院時行李都未執好。
任賢齊的女友Tina於情人節前夕，即2月13日中午時分在香港一間醫院誕下一名男嬰，重五磅三安士。本來預產期是在下個月，不過BB突然提早一個月趕𢭃利是，小齊開心說：「好開心呀，佢哋母子平安，今次係開刀嘅，我冇陪入產房，不過今次好突然呀，因為預產期係下個月，點知BB突然提早咗成個月出世，Tina突然間肚痛，於是即刻夜麻麻送佢入醫院。」
未有準備娶老婆
小齊笑言在未有心理準備下BB突然出世，就連入醫院的行李都未執好，兒子的名字當然也未改。小齊與女友已經是第二任父母，記者問小齊何時迎娶Tina？小齊笑說：「啱啱先生完BB，又生得咁急，都未有準備喎，畀啲時間我啦！」
其實早在05年5月Tina已為小齊誕下小千金，但小齊與女友一直未正式註冊結婚，有傳他們在美國已拉埋天窗，不過一向口密的小齊不肯透露半句。
接拍杜琪峯新片
為了努力搵奶粉錢，小齊早前已接拍了由杜琪峯開拍的電影，與古天樂合作，而下半年又會繼續他的內地的巡迴演唱會，在大年初三時他就去了拉斯維加斯登台，幸而趕及回來陪女友生BB，小齊說：「BB就晒我啲時間出世喎！」
撰文：李全