阿美成　馬楚成

馬楚成雙魚座，雙魚座出很多藝術家、夢想家，魚女永遠雙眼閃閃像公主、魚男到70歲都像男孩。
幾年前他帶《星願》和《東京攻略》去日本，沒人相信兩部戲同一個人拍，「後來他們跟我聊天，結論是，惟有romantic一字可解釋，他們說我seemslikeakid。」
一個佬還如何kid得起呢？以中產情懷起家的陳可辛拍戰爭片了、周星馳CJ7講父子情了、古惑仔劉偉強越拍越男人了，馬楚成新戲叫《花花型警》，「花花幾好聽，好似《麼麼茶》咁。」「你可以叫我做馬馬。」
馬馬有卡片派，設計有如一張菲林，左下角是公司名，叫做AmazingFilms，好普通呀呵？有中文㗎！好彩不是「奇異的片」，是「阿美成」，Amazing個成。訪問回程途上，我在巴士上噗一聲笑了出來。

記者：劉嘉蕙
攝影：譚盈傑

「下部戲得唔得呀？」

馬楚成很有熱力。
從十幾度的彌敦道轉入馬楚成辦公室，他吃着奶醬多熱咖啡，看到記者，推一堆糖果到我面前。開場白，「我有冇爭你錢呀？」梗係答有啦。「哎吔！」又推了5蚊給我。
訪問當天剛爆發淫照事件，他剛剛公幹回來，一張相沒看過，咬着多士跟大家嗡嗡嗡討論，忽然一臉苦惱，「吓，我下部戲預咗阿邊個喎！點算好呀？你覺得仲得唔得呀？」他84年入電影行，拍戲耐過我睇戲，身後電影獎一座座，下部戲得唔得，問我?!
親切是性格，也是他的方法。「我鍾意開心拍戲，享受拍戲的過程，好多演員同我拍戲都好開心。」
假如導演都有生涯規劃，一般是賺完獎金獎品後進軍荷李活，馬楚成說以上冇一項是他目標。
「好像有人鍾意飲威士忌，我鍾意花雕，香港拍戲好開心㗎，老闆給你一筆錢，你專心拍好佢，觀眾喜歡就得。美國有制度，跟監製談不來，佢唔畀你剪片，炒你魷都得！去荷李活要放棄好多自由，錢係多好多，但係帶唔到入棺材。」最後這句，他說時皺皺眉，像幼稚園老師教我「未洗手係唔可以食飯㗎」咁款。

■有相為證，卡片印明「阿美成影畫」，seemslikeakid，我信了。

男女通殺毋須掙扎

做導演，他有很多經典，《星願》及《生日快樂》冧死女觀眾，男觀眾嚮往《東京攻略》的瀟灑有型，他說自己雙魚座，「一條桂魚一條石斑！」雙重性格是天生的，在各種題材中游轉，不需掙扎，「我也有局限，我不能拍恐怖片，因我唔鍾意俾人嚇，所以唔可以嚇人，好公道！喜劇我自問也拍不來。但現在我有愛情片、動作片，同時有女仔喜歡的，又有男仔喜歡的，夫復何求！」

■同時搞兩部戲，「我係典型香港人，越忙越開心。」

■《花花型警》頭半部是喜劇，後半以劇情為主，「好似過山車，幾好玩。」

■陳坤斯文、余文樂粗豪，是導演心目中理想配搭。

反轉港男中女

香港人的作風是，趁勢好時盡賺，拍續集拍到爛為止，馬楚成不抗拒商業，但怕無止境encore，「自己貪新鮮，觀眾都貪新鮮，你不停自我重複，壽命好短，要讓觀眾有期待，才能生存。」
所以不介意用新人，他當年大膽起用張栢芝任賢齊擔正《星願》，今次《花花型警》引入陳坤及鍾嘉欣。近年電影多採中港合作模式，主要演員名單需有三分一是內地演員，加上有叫座力的港產女演員買少見少，造就電影出現大量「港男中女」配，觀乎今年電影金像獎提名名單，土產花旦凋零正正是一個現象。馬楚成想扭一扭，開「中男港女」配。「如果大家受落，將來又可以多個人揀，好多巨星都是公仔箱出來的。做導演要發掘新人新題材，不能讓自己思想收窄。」
用陳坤擔正，馬楚成坦言兵行險着，港人慣看內地佳麗，但男主角都係睇番劉德華梁朝偉，「陳坤開頭也不敢接，但我覺得他亁淨斯文，可能是港人喜歡的類型。」
他拍戲着重溝通，新人不了解拍攝，他不介意由零至一逐樣解釋，「以前做攝影，見過有導演呢頭講『非常好』、嗰頭又叫『嚟多個』，點解啫？你要令演員明白呀！可能佢做唔到你要求，係因為佢有其他諗法呢？或者佢意見好啲呢？」

做導演令我長大

馬楚成喜歡保持開放，對演員如是，對自己也如是。
「我到𠵱家都搵緊自己個底係啲乜。成日轉題材，無非想多了解自己，咁樣人先會長大。」
很少聽見一個佬說成長，「因為我成日唔長大。」
「做導演最大得益，是看見自己成熟了。平日寫對白，會思考好多同人相處方法，原來講呢句人哋會hurt喎，望番現實生活，自然多一份體諒。譬如話，男人辛苦工作都係為女人，但女人成日怨男人陪自己少，點解唔學識體諒？點解連講句感動說話都慳番？早啲穿劇情咪早啲感動囉，人生如戲就係咁解。」
「有人問我，成日諗埋人哋點諗，咪好攰？係好攰㗎！但係見到人哋開心，我又開心。」
數吓馬楚成一個訪問講了幾多次開心，真係阿美成。

《花花型警》是有錢仔做警察的故事，浪漫雙魚又來了，「同小齊吹水吹出來的，話如果有錢，做警察最好，有人標參，自己畀二百萬救住佢先，越講越開心，就想拍。」余文樂正是那個有錢差人，坐直升機查案，用錢阻人自殺，結果被停職……