雖然情人節同結婚冇必然關係，但一定有間接連繫──送花、得米、拍拖、有咗、買樓、結婚、生仔……有冇發現，買樓已經成為好多香港人嘅成長必經階段？大陸亦都一樣，不過，華華上個月寫過，大陸地產商萬科集團主席王石，叫人40歲前都唔好買樓，喺買樓幾乎已經係生仔條件之一嘅現實社會裏面，咁富爭議性嘅論調，自不然引起好多討論。就喺大家仍然抝生抝死嘅時候，「始作俑者」嘅王石，竟然將旗下樓盤貨尾玩減價。
元宵搞貨尾特賣
繼廣州、深圳、成都等地之後，萬科連上海嘅貨尾盤都要減價，內地《第一財經日報》引述上海萬科高層消息話，元宵節會整番場特賣活動，最高九五折，只限萬客會會員，牽涉嘅樓盤包括白馬花園、新里程、假日風景等10個貨尾盤。
報道仲引述上海一啲主要地產發展商嘅回應，話暫時未有跟風減價嘅打算。不過，有學者就認為，由於上海樓市前景不明朗，上海萬科帶頭變相減價賣樓，當地中小型發展商應該會被迫跟風。
想結婚生仔又有個上海女友嘅香港老襯，可以放心喺情人節送花求婚嘞，買樓有折頭呀！