泰國近年成為香港人熱門旅遊地，華華個friend農曆新年過去玩，撞到嘅唔止富豪第二代，仲有位高官，而且係同機去、同機返嗰隻。邊個高官同華華老友咁有緣？咪上年因為旅發局總幹事臧明華被指大花筒，連帶佢都頻頻要去立法會解畫嘅旅遊事務專員區璟智囉。
老友初一早機去曼谷，初五晚機返港，去程同回程都係同區專員同機，搭嘅都係國泰。區專員同老公同行，佢哋冇話要坐A1位，而係經濟客位。
區璟智泰國打高球
老友仲見佢拎住個高球球桿套，咁好多人都鍾意去泰國打高球，景靚價錢平嘛，睇嚟區專員都係同道中人，近排天氣咁凍仲可以順道避寒㖭。
華華記得，年廿九區專員先蒲頭話，春節係香港出入境旅客嘅黃金檔，署方會密切留意情況云云，咁佢揀呢幾日出門，唔通係想體驗吓港人出境情況？