正所謂嚴師出高徒，曼聯名宿堅尼當年踢波打甩門牙帶血吞，𠵱家做咗新特蘭領隊被叫做「堅叔」，亦培養出堅韋尼鍾斯呢位「堅仔」。如果兩師徒幫到球隊護級，就真係堅過石堅啦！
「堅仔」傷膝照踢
堅叔對待23歲嘅堅仔如珠如寶，舊年夏天當埋套老西，都要籌夠600萬鎊（約9,180萬港元）將佢從修咸頓挖過來。呢位千里達前鋒亦不負所託，聯賽射入5球成為球隊神射手。唔怪得之前利物浦、車路士出到1,200萬鎊，堅叔即刻扯高衫袖：「乜話？！4,000萬鎊就差唔多！」
我求大俠最近同呢位「傷膝」黑人前鋒傾過計，佢嘅口脗同個性十足十堅尼後生嗰陣。佢話自己一直帶傷上陣，「到目前為止都仲頂得住！」對於領隊對自己嘅厚望，佢好謙虛咁話：「好開心聽到佢咁講，不過我都係盡力做好自己，過份迷戀他人嘅讚賞，只會迷失自我！」
堅尼有咁生性嘅球員，都算三生有幸啦！咁亦反映佢已經係一名成功嘅領隊，繼續努力爭取第日入主奧脫福做「費Sir二世」啦！不過，呢個世界好難贏得所有人歡心，好似62歲愛爾蘭講波佬鄧菲，就批評老友記堅尼做領隊後開始用個肺講嘢。
鄧菲以黃師傅咁嘅口吻講：「我識咗佢好耐，當年佢最反感球壇人士講廢話！估唔到自己𠵱家講埋啲無聊嘢！話英超全球化無得頂，一時話奧拉利適合教愛爾蘭國家隊，一時又話雲拿保斯適合啲！」呢位老人家上氣唔接下氣係咁插堅叔。
人在江湖身不由己
我求大俠勸鄧菲幾十歲人要睇開啲，身份同地位改變，導致行為唔同咗好正常，唔係咩叫人在江湖身不由己啊？佢老人家係老友嘅，就應繼續撐堅尼同新特蘭護級成功，因為目前該隊排14位，僅離開降班區4分啫！