淫照風暴「劇情」日日新鮮，八方同好多人一樣，時刻昅實個網睇吓有冇新嘢，噚日網民爭相forward新料，今次唔係睇新相，而係一篇文章。呢篇文冇料爆，係一篇社論，就係《蘋果》嘅《蘋論》。
噚日篇《蘋論》由《蘋果》主筆李怡執筆，好多網民睇完後拍爛手掌，紛紛喺網上轉貼轉載，成為香港討論區、迷你論壇、高登幾大討論區熱門文章，熱烈程度同搵朋友互傳新相大家分享不相伯仲。呢篇社論題為〈淫照風暴的最大教訓是揭露虛偽〉，內容講乜八方唔重複，因為大家應該睇咗，未睇嘅可以去《蘋果》網頁搵嚟睇睇。
一篇社評清鬱結
網民大讚噚日《蘋論》係「好文」，人人都話要「強推」、「不推不是人」，有高登網民更話「一篇社評清晒我心中所有鬱結」。內地網民應該唔可以上網睇《蘋果》，不過有心人將篇文轉成簡體字，轉貼喺近日以出相快而聞名嘅「天涯社區」，有內地網民睇完後十分感慨，「這才是新聞自由，敢於發表觀點而不被官方左右，為這樣的的媒體喝采。反觀內地的媒體都不敢明確自己的觀點，甚至連香港網友的示威遊行都不敢報道。」
李怡係老牌政論家，辦過政論雜誌，八方相信好多後生仔未必好認識佢，因為淫照風暴成為新一代網民偶像，喺「北天涯、南高登」都有fans，唔知佢覺唔覺得意外。網民對呢篇文章咁大迴響，講到底，都係因為太少人講真話，好多人勁虛偽，有篇文章講中佢哋心聲，當然要「強推」。
𠵱家真話稀罕，謬論氾濫，好多人話要趁呢個機會，用淫照做反面教材，教育下一代提高道德水平，唔好亂搞男女關係，八方認為教吓大家明辨是非、分清黑白仲實際，分到黑白，就唔會天真到亂影淫照，曉得辨別是非，就唔會儍更更亂傳淫相。
內地網民認為有新聞自由嘅地方，先寫得出擲地有聲嘅評論，八方認為唔使咁上綱上線，香港有新聞自由，點解有咁多混淆視聽嘅評論文章？喺互聯網年代，冇人可以阻到你發表自己意見，只要係言之有物有道理，一放上網自然會引起網民共鳴轉載。互聯網雖然係一個虛擬嘅世界，卻係一個容不下虛偽嘅地方。