噚日大市反彈306點，內房股亦趁勢收復失地，旺角李先生見內房股有機會轉勢，推介碧桂園（2007），建議6.2蚊買入，目標3個月見8.7蚊，睇升四成。
楊:楊慧玲姚:姚浩然朱:朱紅
李先生：我今日推介碧桂園，因為股價一路俾人質低，現價又同招股價差唔多，宏調影響唔係好似想像咁大，所以睇好佢前景。
楊：你唔怕雪災會有短期影響？
李：冬去春來，𠵱家雖然受宏調影響，但3個月後地產會復蘇，近期股價都已經回落一成。
姚：內房股近期嘅旺股有中國海外（688），之前碧桂園高位回落，主要擔心佢可能違規圈地同土儲多，內房股都係首推中國海外，因土儲適中，財政較好，城巿分佈較分散，而且係行業嘅龍頭股。
朱：內房股都係首選龍頭股好，除非你非常熟悉碧桂園先可小注買，巿況疲弱，反彈都會係龍頭股行先。
楊：其實四叔（李兆基）都講過「買股要買龍頭股」，佢喺碧桂園招股時已經入貨，股價回落一半佢都冇走貨，支持同鄉。
朱：其實發房地產嘅窩輪要睇巿值，碧桂園我哋就冇出窩輪。如果你睇國內樓巿反彈內房股可長揸，上年第四季內地樓價回落5%，後巿未明要審慎。
姚：碧桂園土儲較多，如果中央唔准囤積土地，要佢哋起晒樓，財政壓力會較大。反而中國海外土儲適中，有二千幾萬平方米左右，財政壓力細，上次碧桂園跌另一原因係佢哋發債失敗，財務受到影響，短線我會建議李生換馬買龍頭中國海外。長線嚟講，內房股係一個唔錯嘅選擇。
-旺角李先生建議-
建議買入價：6.2元 目標價：8.7元
止蝕價：6元 時期：三個月
東亞銀行（023）
博業績增長好
關公：大市雖然回升，但未算穩陣，喺波動市中要揀東亞銀行（023），我喺40.6蚊入咗，目標價46蚊。
楊：點解睇好呢隻股？
關公：佢喺15號（本周五）公佈07年度業績，券商預測東亞盈利有超過20%增長，有42億幾，又有大行睇佢嘅目標價可以見59蚊。
姚：東亞業績應該唔錯，但要留意次按問題對佢業績嘅影響有幾多。我個人都認為好吸引，因為股價已喺高位回落咗好多，相信40蚊有支持。
關公：股價喺今年初見過47蚊。
朱：東亞現價都算吸引，一如關公話齋股價見過47元，近日又有大行睇淡中資銀行股，所以可以留意番傳統銀行股，東亞喺40蚊左右可以考慮。
楊：不過，大行美林預計東亞舊年只係多賺10%，怕唔怕？
關公：唔怕，中銀（2388）都喺50蚊樓上入股東亞，仲有10蚊水位。
-大埔關公個案-
買入價：40.6元 目標價：46元
止蝕價：38元 時期：三個月
中國人壽（2628）
$27想買貨
李小姐：中國人壽（2628）喺內地開巿後會點？宏調對股價有冇好處？27蚊係咪可以買？
朱：國壽股價調整較大，佢早前發咗盈喜，短線有機會反彈。巿場擔心內地股巿會影響國壽嘅投資收入，加上擔心業務受次按問題影響，大行調低目標價到33蚊至35蚊，27蚊可考慮買入，公佈業績後有機會會再升。
李：業績前定後買好？
朱：價啱可先小注入正股，短線亦可小注吼Call輪，不過要揀年期較長同貼價嘅窩輪。
姚：巿場擔心國壽第四季業績會跌，只要第四季業績唔太差，股價應該有承接力。不過短期走勢唔係太好，除非A股見底回升，估計業績公佈前都係窄幅上落，如果睇長線低位買都無妨。
恒指put輪（5495）
大市勢危小注開put
David：大市雖然反彈，但係成交得六百幾億，港股走勢認真麻麻，我睇恒指有機會試21000點，所以推介隻恒指put輪（5495），小注怡情，建議現價0.243蚊買入，睇0.31蚊。
楊：窩輪朱小姐最熟，你點睇呢隻輪？
朱：論條款，𠵱隻輪8月到期，行使價22800點，算係貼價窩輪，睇番成交量亦夠，如果睇淡恒指都算係幾合適嘅選擇。不過David要留意，好多窩輪個價一超過兩毫半，就會行慢咗，冇咁活躍。建議可考慮番啲兩毫子樓下，又貼價嘅恒指put輪。
-西環David建議-
建議買入價：0.243元 目標價：0.31元
止蝕價：0.22元 時期：兩星期
廈門港務（3378）
三通概念有得炒
Ben：我已經喺2.15蚊入咗隻廈門港務（3378），因為有三通概念，尤其三月台灣大選，如果國民黨上場，我覺得會炒番轉，你哋點睇？
楊：先睇廈門港走勢，國民黨喺台灣立委選舉大勝之後嗰日，隻股曾大升超過一成，廈門港係咪真係可以炒三通概念？
姚：台灣三月選舉時可炒一炒，但要小心係短暫，因為市盈率仲喺20倍樓上，唔算平。其他港口股市盈率喺近期跌市之下亦相應向下調整咗，所以廈門港只宜短炒不宜中長線揸住。呢隻股喺2蚊有好大支持，可考慮2.1蚊邊小敲，趁台灣大選之時獲利。
朱：我好同意呢隻股適宜短炒，因為上一次國民黨立委選舉大勝，股價唔多唔少都已經反映咗有關嘅消息。
Ben：天津港（3382）同廈門港邊隻好啲？
姚：以市盈率同埋注資概念嚟睇，天津港較優勝。
-北角Ben建議-
買入價：2.15元 目標價：2.5元
止蝕價 ：1.8元 時期：半年
