中國人新年傳統，已婚之人就要派利是，有些人為免破財會選擇避年，不過身為媽媽級的謝安琪（Kay）一向喜愛過新年，派利是更是她特別喜愛的環節，因為她喜歡見到別人收到利是時的笑面，所以今年她預備了五位數的利是派街坊。
身為媽媽級的謝安琪，新年當然要派利是，她表示去年懷着仔仔張瞻時，親戚朋友和市民都預早派利是給BB，所以囝囝未出世已經收到五位數利是，她說：「我舊年陀住BB出街時，有啲市民街坊都話要畀利是我個仔，有啲仲要畀500蚊同100蚊，認真大手筆，阿仔未出世都有五位數利是錢，今年佢應該都會有好豐富收穫。」
最愛派利是
阿Kay指會將仔仔的利是儲起作為教育費，她笑說：「阿仔大個自己顧自己㗎啦，睇佢嘅走勢未出世都有咁多利是，一路儲到佢大個，應該可以自己養起自己，佢呢啲小朋友真係白手興家呀。」
不過阿Kay表示新年前有一個怪現象，就是不少朋友都向她預留利是，她說：「我都唔明點解好多人見到我都叫我留番封利是畀佢，其實新年派利是我覺得好開心，見到人哋收利是時個開心樣我都會覺得開心，所以我唔會肉赤㗎，呢兩年都係預五位數派利是。」
最怕同人比
與阿Kay談及新年趣事，她最討厭小時候與親戚團拜時的比拼環節，她笑說：「唔知點解細個時啲大人好鍾意叫晒啲小朋友背對背度高，佢哋有冇諗過最矮嗰個小朋友個心係幾咁難過？所以我一定唔會畀我個仔經歷呢個度高活動。」
阿Kay又指小時候總有親友不識趣，於其父母面前問她考試成績如何，幸好她讀書的成績不錯，不至於令父母尷尬，她說：「個大人又係冇顧及小朋友感受，如果個小朋友真係考得唔好嘅話，叫人哋點回答呢個問題呀，最慘連人哋個父母都唔知點落台呀嘛。」
採訪：李珮洳
攝影：陳偉權
場地提供：AURA
化妝：Kris
髮型：Derrick,EvaofChin.G
Stylist：CC.Workshop