立法會新春休會，不過議員已經開工，陳太、李鳳英同李永達等幾個議員，噚日開工大吉，喺立法會申訴部接見綜援人士。噚日係陳太當選後首次到申訴部處理市民投訴，可能陳太有個四萬笑容，個樣好似好易話為，人人當佢生神仙，除咗要求佢幫手爭取加綜援金，仲順便請佢幫忙爭取調高生果金，新正頭要講好說話，陳太當然冇托手踭。
陳太上任兩個月，佢同八方講今個新年冇外遊，特別留喺香港睇文件，遲啲會出訪南韓。佢話議員工作最困難係游說官員，有時會以過來人身份，勸諫官員有時唔使太堅持己見，因為政策可以變，至於官員聽唔聽得入耳，陳太冇明言，只係話大部份官員對佢好客氣，只係個別官員有啲唔同咗。