天下有情人最重要嘅大日子，除咗邂逅日、定情日、結婚紀念日，睇怕都係情人節嘞，英國皇儲查理斯王子都唔例外，不過，佢同Honey卡米拉度過婚後第三個情人節之前，王子唔係忙買禮物𠱁老婆，而係同第三者許下承諾──唔通王子又有外遇？非也，佢係同中國林大（910）合作搞環保。
合作搞環保
話說做開生態林業嘅林大前日宣佈，同ThePrince'sCharitiesFoundation合作，一齊為節能減排努力。佢哋會齊齊斬少啲樹、排少啲溫室氣體，仲會孖住發展清潔能源同更新造林。而王子亦向林大許下承諾，話會一齊分享基金會喺全球生態雨林項目積累嘅專業知識。大家目標咁一致，今次合作都算係門當戶對。
王子喺情人節前做件咁有意義嘅事，睇怕卡米拉就算真係收唔到花，都一定會舉腳撐佢老公嘅！