聽日情人節，有拖拍嘅後生仔女好緊張，對於一啲幾十歲嘅老夫老妻可能冇乜感覺，社聯行政總裁方敏生結婚廿五年，佢噚日出席婦女動力基金一個推廣兩性平等活動時，自言近年冇同老公慶祝情人節，不過原來咁都有好處，就係隨時有驚喜。
方敏生話記得三年前情人節，由於仔女去咗外國讀書，兩公婆忽然有番久違嘅二人世界，兩個人你眼望我眼，竟然覺得好sweet，𠵱家回想仍然感到好溫馨，「內心好回味嗰一刻，兩個人一齊，好過佢送花畀我，好過請我食蛋糕。」
出席同一場合，結婚超過25年嘅立法會議員張超雄賣口乖，話日日都係情人節，因為佢無時無刻都唔敢忘記老婆，「我日日都要諗橋冧老婆開心㗎！」