羅旭瑞打骰嘅百利保（617）噚日宣佈，委任梁寶榮做執行董事兼審核委員會成員。講起梁寶榮，華華即時諗起十年前嘅1998年，寶官俾人調返北京做首任駐京辦主任，結果一做就做咗7年，到2005年先退休，結束佢32年嘅公務員生涯。
駐京7年開埋餐廳
當年就有人話，寶官因為做過肥彭私人秘書而俾人放逐。不過，退休後嘅寶官，曾經好樂天知命咁話佢只係香港政府一個小角色，根本講唔上俾人放逐；更何況，佢喺北京咁多年，老早已經落地生根，仲開埋餐廳做老闆㖭。
之前寶官已經做咗保華（498）嘅獨立非執董，今次做百利保董事，一年嘅酬金有10萬銀，另加做審核委員會成員嘅每年酬金5萬銀。至於同為百利保獨立非執董嘅政界人物，仲有做過市區重建局前身土發公司行政總裁嘅石禮謙。