由年三十晚食到年初六,後遺症一盒二盒餸頭餸尾塞滿雪櫃,雖然有雞有蝦有燒肉,但就咁翻熱食,真係食到悶!好彩小松本太太CoCo教我利用剩餘的餸菜,加點創意重新包裝成正菜,趁住今日人日,煮嚟招呼朋友都絕不失禮。
記者:趙珮倩
攝影:陳陶鈞
示範:和風料理導師小松本太太CoCo(http://hk.myblog.yahoo.com/coco-cook)
豆漿海鮮飯
00hr15min
份量:4人
親戚朋友嚟拜年,食剩幾隻大蝦同大煲冷飯,唔想下下炒冷飯咁悶,CoCo教路可加入豆漿變海鮮燴飯,勁似Risotto。
材料
洋葱粒/番茄粒/蜆肉各50克、青/紅/黃椒粒各50克、大蝦4隻、青口4隻、蒜頭1瓣(剁碎)、橄欖油2湯匙、鹽適量、胡椒粉適量、豆漿1杯、冷飯2碗
做法
1.燒熱易潔鑊下1湯匙橄欖油及蒜茸爆香蜆肉、大蝦及青口盛起備用。
2.燒熱易潔鑊下橄欖油,放洋葱炒香,再加入番茄粒及青紅黃椒粒。
3.將冷飯倒入鑊內炒勻,鹽及胡椒粉撒入鑊內調味。
4.注入豆漿拌勻煮沸,將海鮮鋪在飯面加蓋轉中火煮約2分鐘至豆漿略為收亁即成。
貼士
豆漿要用無糖的,有糖豆漿味道帶甜不宜用來煮這個菜。
Monica問:可唔可以用忌廉代替豆漿去煮?
答:可以,但要加入適量雞湯同煮。用忌廉煮口感較Creamy,不過會較膩。
梅酒焗紹菜
份量:4人
00hr15min
個人經驗,過年過節最常食剩食物之一就是燒肉,剩番幾件點搞好?以紹菜加入梅酒燜煮,有菜有肉又一碟靚餸﹗
材料
紹菜1棵、燒肉適量、梅酒3至4湯匙、鹽適量
做法
1.燒沸水一鍋,將紹菜逐片放入灼軟後取出瀝亁。
2.瀝亁之紹菜捲入燒肉成卷狀。
3.將紹菜燒肉卷放入瓦鍋,撒鹽及加入梅酒,大火加熱至沸騰後轉中火焗約5分鐘,至紹菜軟腍即成。
貼士
燒肉本身已夠味,故毋須下太多鹽調味。
何小姐問:唔用梅酒用紹酒得唔得?
答:紹酒色澤較深,會令紹菜轉深色;你可試用桂花陳酒,令燜出來的燒肉帶有桂花香。
鵝肝雲吞
份量:4人
00hr20min
有些朋友過年喜歡親自包雲吞、水餃招呼親友,但往往包剩不少雲吞或水餃皮。CoCo就諗到將同樣吃剩的雞肉加入鵝肝醬做餡,再炸成雲吞,即時升價十倍,個個爭住食。
材料
鵝肝醬125克、雞肉200克、日本沙律醬/芫荽各適量、雲吞皮2両、意大利陳醋3湯匙、糖1湯匙
做法
1.芫荽切碎;雞肉切碎。
2.鵝肝醬放大碗內,加入雞肉碎、芫荽碎及日本沙律醬拌勻成餡料。
3.雲吞皮包入餡料成鵝肝雲吞。
4.燒熱炸油,將鵝肝雲吞炸至金黃後取出。
5.另燒熱鑊,將意大利陳醋及糖放入至糖溶化,與炸妥之雲吞伴食。
貼士
燒熱油後,可用筷子放入油中,見有小氣泡滲出即表示油溫適合炸煮。
梅小姐問:鵝肝醬係咪好貴?有冇其他醬代替?
答:鵝肝醬有平有貴,幾十元都可買到有一小罐,你亦可以任何肉肝醬代替。
桂花蓮子糖水
份量:4人
00hr20min
𠵱家啲細路未必個個喜歡食糖蓮子,不妨加埋剩餘的年糕一齊煮糖水,滋潤甜蜜,連糖都唔使落。
材料
糖蓮子1/2杯、水2杯、桂花1茶匙、年糕適量、片栗粉適量
做法
1.糖蓮子及水放鍋內煮沸,當糖蓮子上的糖全部溶化後離火。
2.將桂花放入糖蓮子及水內加蓋焗將5分鐘成桂花蓮子糖水。
3.年糕切成丁粒後沾上片栗粉。
4.燒熱炸油,將(3)炸至表面微黃後取出,放入桂花蓮子糖水即成。
貼士
另可以馬蹄糕代替年糕,效果會較清甜。
余小姐問:「乜嘢係片栗粉?」
答:片栗粉即係日本人用的生粉,你亦可用普通生粉代替。