記憶中，香港好耐未試過咁凍，天文台發出寒冷氣溫警告，由一月下旬至到農曆年，時間之長，破晒歷史紀錄，於是學生Ｙ喺新年攞利是時問：「我哋仲講唔講全球暖化呀，中國華南華東有雪災，香港氣溫低，加拿大冷死兒童，邊度有暖化呀？」話畀學生Ｙ聽，時髦人士唔再講globalwarming咯，改為講氣候轉變（climatechange）。講暖化可以畀人反駁，講氣候轉變就無得拗撬，所有大風大雨大雪或無風無雨無雪，水災旱災風災雪災，統統可以歸咎於氣候轉變，點講都啱。
香港人覺得天氣零舍凍，甚至凍過去東京、北海道，睇怕另外有一個獨特原因。譬如新年前最後一次跑馬，市區氣溫約九度，沙田氣溫約七至八度，兼且天陰有雨，寒風陣陣，仍然入馬場嘅忠實馬迷無不雪雪呼凍，着晒禦寒大褸，但入到四樓紫荊廳，仍然開緊冷氣，凍到好多老人家（現在嘅忠實馬迷多數係中年以上人士）唔敢脫衣，坐在室內仍然穿上羽絨外褸者，大不乏人；室內為何要開大冷氣？據一位朋友話，香港大廈多數無暖氣，只有冷氣，冬天開着空調系統，只係抽風吹風，將外邊冷空氣抽入嚟，於是室內與室外溫度無甚分別，一啲外國人來到香港，慣咗一件單衣，一件外褸，入到室內，就知道中計。
呢位朋友或者講得啱，好似左丁山間寫字樓咁，冬天唔開冷氣機就好焗，開咗就覺得好凍，唯有將冷氣機溫度係咁調高。另一方面，香港人太過習慣咗冷氣，無冷氣不歡，完全不能忍受室內開暖氣。冬天時間去東京、北京，入到室內就覺得好辛苦。
香港酒樓茶室會所內之冷氣系統，全部有盲點，一位老友最近袋住一頂毛冷帽，入到酒家首先揀位座，永不坐在冷氣槽之前，如有遇冷風吹頭，立即戴上冷帽。在室內吃飯而戴帽，好似冇禮貌，唔尊重主人家，但為咗自己健康着想，唔顧得咁多咯，最多戴帽前先向主人家道歉便是。