新年好忙，又要去林村探許願樹，又要去親戚屋企拜年。揸住架車周圍去，望住錶板嘅油缸指示，話咁快由「Full」去到「Empty」，油價咁貴，諗起都肉痛，於是咪學人停車熄匙囉！偷偷哋話你知，小妹咁做唔係關心環保，只係關心自己個荷包咋！
點知俾身為汽車工程師嘅香港汽車會執委李耀培省咗一輪。佢話停車熄匙確係可以慳油，但平日揸車遇到停車要熄匙嘅機會唔大，慳油唔多；車主如果真係要慳油，記住行車唔好太慢亦唔好爬頭。
開暖氣唔多耗油
佢講中小妹嘅弱點，我最鍾意逢車過車嘅感覺，好爽！但佢話爬頭既要踩油、間中又要踩brake，好嘥油㗎；另外，車速穩定固然緊要，但太慢亦反而嘥油，因為數據顯示，車速50至60公里最慳油，如果慢過50公里，架車就食多啲油啦！
不過，呢排天氣咁凍，喺車廂入面開暖氣，其實唔多耗油喎。李專家解釋，開冷氣要經過冷氣泵，冷氣泵要汽油作補充，所以開車開冷氣好嘥油；相反，暖氣只係利用引擎發出嘅熱力……佢醒我咁多貼士，慳埋慳埋，下個新年咪可以買多幾件新衫！
逢周一至周四刊出