聽日就係情人節,相信唔少女仔都好希望收到男朋友送嘅花!但係小妹就好煩惱,因為年年情人節都收到太多傾慕者送嚟嘅花,搞到我唔知點處理,尤其係啲花又靚又咁貴,但只係擺得三幾日就謝晒。今年,我唔想幾日就將傾慕者嘅愛慕之情丟去垃圾桶,咪打電話畀開花店嘅老友兼資深園藝師陳小姐,問吓佢有冇些少貼士教我。
花樽水位至少6吋
佢話,護理鮮花最重要嘅一環係每日都要同鮮花剪腳,仲要係45度打斜角剪,令啲花吸收水份。仲有,原來鮮花係要浸多啲水先得,最理想嘅做法,係將花束放落花樽之後,水位至少要有6至7吋,越大嘅花束就越要放多啲水。
最後一個貼士,就係麻煩男士們,買花嘅時候問吓間花店攞一小包粉狀嘅保鮮劑,一併送畀女仔,等我哋將保鮮劑倒落浸花嘅水,咁啲花就可以擺放最少一星期㗎喇!
逢周一至周四刊出