每年年初都係各大最佳汽車選舉頒獎典禮舉行嘅日子，我車報員咁關心世界車壇上嘅大小事，梗要八八卦卦咁昅到實一實，睇吓有咩新料可以報畀大家聽啦！繼之前Volkswagen喺德國汽車協會（ADAC）嘅「2008YellowAngel」頒獎典禮中，憑最新嘅TSI引擎同7前速DSG半自動波箱贏得「最先進及環保科技」殊榮後，日本Nissan又憑住旗下一款VQ系列嘅V6引擎，再一次冧莊奪得「十大最佳引擎」大獎！
今次係Nissan嘅VQ系列引擎，連續第14年喺由世界著名汽車雜誌《Ward'sAutoWorld》所舉辦嘅「十大最佳引擎」選舉中獲獎。呢個選舉係由6位嚟自《Ward'sAutoWorld》雜誌同會訊嘅編輯，喺37台於08年第一季以前在美國發售、並配用於售價唔高於54,000美元汽車身上嘅引擎中推選出嚟。一眾評審員都認為，配用深受美國車迷歡迎嘅6前速手波版InfinitiG37身上的3.7公升VQV6引擎，無論喺性能同耗油表現上都比對手優勝，因而能夠連續14年奪得有關獎項。另外，屬同一系列嘅3.5V6型號引擎，亦有用於喺本港熱賣嘅Cefiro350JM、Elgrand同Fairlady350Z車款身上。吖，唔知家陣揸緊呢幾款車嘅朋友，有無因為咁而覺得自己身價暴升呢？
記者：車報員