英皇集團旗下隻新傳媒（708）噚日上市，老闆楊門一脈總動員撐場，喺老大楊受成同太君楊老太率領下，新傳媒首日股價急升，睇嚟楊老太真係鎮得住場。
三代齊心一家撐場
楊生呢輪面對傳媒壓力，依然一臉淡定，咁佢出名孝順兼且一家人齊心，除咗楊太君出嚟支持，楊太陸小曼、大女楊諾思、二女楊玳詩、大仔楊其龍都齊齊撐場，重現上年4月英皇證券（717）上市嘅盛況。
查實已屆高齡嘅楊老太好活躍，不時以行動支持乖仔，好似今年初容祖兒嘅演唱會首場、上年11月英皇鐘錶珠寶搞嘅珠寶首飾預展、英皇陸運會、65周年紀念晚宴等，楊老太都氣定神閒咁出席，而且仲表現投入，絕對係母慈子孝。
由於係鼠年首隻上市嘅新股，又適逢新春佳節，新傳媒送畀港交所（388）嘅紀念品亦好有意頭，係由5個利是封組成嘅掛畫，利是封面印住新傳媒5份雜誌嘅圖案，都幾有心思。
另外，由於全球華人關注嘅淫照風波餘波未了，噚日繼續吸引大批娛樂同港聞記者到場追訪楊受成，港交所亦採取特別措施，檢查記者工作證，只准財經版記者入場。
最初只准財記入場
不過，最終楊生都畀所有記者進入，但係論採訪場面墟冚程度，就拍馬都追唔上阿嬌前日現身嘞。
電郵：mailto:[email protected]