淫照風暴仍是社會焦點，自鍾欣桐日前現身交代事件後，陳冠希也傳將於周末返港面對公眾，昨日不少藝人均表示陳冠希應及早回港交代一切。
袁彌明：
我認為陳冠希反而應該係第一個出嚟交代事件嘅人，我睇報紙話佢要同女朋友過埋情人節先返嚟，真係有冇搞錯，都唔知攞景定贈興。陳冠希要立即返嚟同警方合作，仲要向公眾叩頭認錯，同埋將屋企電腦嘅珍藏完全銷毀。
白韻琴：
如果陳冠希仲想喺演藝界工作，一定要盡快出嚟面對群眾，不過見大家時，就唔可以好似阿嬌咁笑住出嚟回應，佢要以受害者姿態博同情，佢可以作個古仔話自己過去受過女人性暴力陰影，所以先身不由己做出呢啲行為，陳冠希仲要邀請所有受害女性一齊接受心理集體治療，令大家原諒佢。
戴妮廷：
我唔覺得Edison要返嚟交代喎，好坦白講，影呢啲相我覺得係一個願打一個願捱，咁出咗意外，好似天災人禍咁，你唔可以怪晒一方囉。你話出嚟交代喎，好難交代囉，相又登咗，唔通叩頭道歉咩？唔講仲好，等件事快啲平息。Edison都好難受，佢唔喊唔代表佢唔hurt。
吳嘉龍：
我為嗰啲女仔覺得好慘囉，Edison都好慘，真係好大件事，佢即刻走去外國都好正常，佢唔返嚟交代，講真，好多嘢我哋係唔知，係涉及好多人、好多公司、好多唔同情況，所以真係好複雜。不過，佢哋無論男同女全部都要為自己嘅行動負責任。
