年三十晚，孫柏文同孫媽媽食團年飯。可能因為我曾經雙失過，阿媽就好關心我喺工作上嘅近況。我就同阿媽話：「分析出嚟嘅股票貼士表現極之參差。」阿媽就話：「即係一切如常。」
當然，作為一個經常想自我增值嘅人，我亦有把握機會問：「阿媽，你覺得我喺鏡頭前嘅表現點？」孫媽媽：「因為屋企冇得上網，所以你主持嘅《蘋果日報》網上節目就唔係好清楚。」
我：「咁喺有線電視嘅表現又點？」問完呢個問題之後，孫媽媽即刻黑面。孫媽媽：「我唔知！」
我眼見佢部有線電視機頂盒正在顯示個「8」字，所以就問：「阿媽你冇睇咩？」孫媽媽：「講起就要鬧，真係想去投訴。我嘅有線電視cut咗。」
我：「Cut咗？你個仔有份做節目，都cut？」孫媽媽：「你估我想cut咩？我都想睇你做節目。之前申請有線電視時，明明畀咗銀行戶口資料佢哋做自動轉賬，諗住唔使煩。點知有一日，突然冇得睇。個戶口明明有錢，都唔知做乜鬼。跟住就開始收到電腦錄音追數電話。」
我：「咁點呀？」孫媽媽：「點呀？咪即刻打電話畀客戶服務部。佢就話要fax張form嚟，補資料。不過我都冇fax機，所以就叫佢寄嚟，佢亦話ok。點知等咗十日都未到。過咗十日，我再打電話去客戶服務部，佢又話會寄form嚟。到今日都未到。」
我：「唔係嘛？」孫媽媽：「佢哋啲追數電話，仲要每日幾次！好煩。」就到呢一刻，阿媽嘅電話突然響起。就喺我哋食團年飯之際，孫媽媽訴苦中，又有另一個有線電視追數電話。真係睇電視劇都冇咁戲劇性。
好多人話I-cable（1097）箍想離開嘅客「好進取」，係咪因為就連想繼續睇有線電視嘅客都激嬲晒？節目做得更好，都冇用？我阿媽都搞，that'sjustwrong。
金手指網誌： http://phatdat.blogspot.com