日前阿嬌出嚟面對傳媒，爆出咗金句：「我當年好天真，好儍！」我求大俠覺得阿嬌從來都唔儍，仲好精㖭！咁咩先叫儍同天真？睇吓聖保羅前鋒阿祖安奴（阿祖）就知啦！
話說周日聖保羅州聯賽對山度士（聖保羅贏4:2），89分鐘阿祖衝入禁區後同杜明高斯發生衝突，雙方面貼面互「索」一番後，阿祖沉唔住氣將頭輕輕撞向對方，杜明高斯將頭一縮感到一臉惘然。正當兩人邊口噏噏走開之際，球證竟然向阿祖出示紅牌！唉，雖然呢鑊阿祖係有學施丹鐵頭功之嫌，但都唔使見紅咁慘啩？
輕輕頭頂頭都見紅
我求大俠睇咗成個過程，覺得阿祖的確有錯，但唔係所有錯都要上身，正如「淫照」事件唔可以怪晒edc咁！杜明高斯主動面貼面擺明挑釁，好似自願影裸照嘅疑似女星咁，同樣需要負責任；而成件事最低能就係球證，唔知頭唔知路就出牌，成個警界一哥咁款！
阿祖又係爭唔落，被國米流放到聖保羅，最近仲入咗4球，點知就克服唔到儍同天真。據講巴西體育法庭已調查事件，阿祖好可能被判停賽120日至540日，不過好在停賽令只喺州聯賽實施。阿祖仲儍吓儍吓咁話：「佢睇到啲咩呀？我只係問對方做咩用手遮我塊面咋！」
衰開就要識自愛
連聖保羅教練都唔幫阿祖：「佢唔應該咁做，好在冇主動挑釁對方。」呢個世界好奇怪，香港地有錢人點冇品都有着數同特權，喺巴西就相反，有錢佬有咩唔見得光，差佬同社會都唔會放過佢。所以呢，我求大俠勸阿祖喺今次事件後，要學似我哋嘅阿嬌咁，識得保護自己，唔係出咗事先出嚟扮晒受害者，而係平日多做善事少做衰嘢，冇痛腳就唔會有人針對你啦！
想睇阿祖點頂人？即上 http://globoesporte.globo.com/ESP/Noticia/Futebol/Campeonatos/0 ,,MUL294637-1306,00-IMPRENSA+ADRIANO+O+INSANO.html啦！