煲呔望穿秋水，禮賓府終於傳出喜訊，香港第一家庭增添新成員，煲呔新抱喺今個月五號年廿九當日生BB，即係煲呔終於榮升阿爺級，恭喜恭喜，煲呔農曆年假期時可以日日弄孫為樂。
特首辦證實特首抱孫，接近煲呔消息稱第一家庭新成員應該係個金豬BB女，呢個金豬女係由自由黨副主席周梁細妹、婦產科名醫梁淑德接生，據講喺養和出世，至於BB女幾重、似唔似阿爺，呢位人士話唔方便隨便講，都係留番煲呔自己講好啲。
年廿九當日下晝，煲呔兩公婆去維園行花市，當日佢蓮子蓉口面，原來除咗因為程翔返港同家人團圓外，佢都有大喜事，八方祝佢個孫女快高長大，聰明伶俐，夠18歲時可以投票選特首。