淫照害人，鄧麗欣曾是陳冠希的緋聞情人，也被人移花接木發放假裸照，方力申則是淫照女角鍾欣桐的緋聞情人之一，憤慨罵拍照者變態。
錯綜複雜，小方與Stephy撇開陳冠希與鍾欣桐，已攞正牌「拍拖」達五年，無論戲裏戲外，都被認定是一對。
口硬心軟，二人雖然分開訪問，但禁不住情投意合，互讚對方是80分情人。
心靈相通？不是每對情侶都可以，今年情人節，小方雖然要練跑應付馬拉松，但仍想抽空與Stephy在錄音室見面。撰文：王連連
方力申和鄧麗欣（Stephy）合作無間，有錢齊齊搵，合唱情歌、拍戲做夫妻、廣告一齊拍。工作時流露出的默契，外間早已認定他們是真正情侶。莫論二人是否在談戀愛，但螢幕情侶、好拍檔就是鐵一般的事實。
「好大安全感」
近五年來，小方和Stephy攞正牌「拍拖」，默契早就建立。就連思想也相通，想法一致，互相覺得對方是80分的情人。
Stephy先說：「佢份人好細心，家庭觀念好重，我經常聽見佢提起佢嘅屋企人，相信佢係好錫佢家人。男仔顧家好重要㗎！而且好乖仔，放工又唔會去玩，聽親佢提起嘅節目，都係跑步、游水，真係好健康，又唔會有不良嗜好，如果同呢類型嘅男仔拍拖，會有好大安全感。」
至於小方對Stehpy也讚口不絕，他說：「佢絕對係理想嘅情人，優點好多，樣靚、工作態度好、個人好細心、而且好溫柔。我覺得佢好鍾意笑，個人好容易就開心，尤其係佢唔夠瞓，就特別鍾意笑，女仔最忌係苦瓜亁。」
對至親發脾氣
雖然小方及Stephy互指對方不是滿分的情人，但二人同樣覺得自己未是完美，不約而同大家也只是覺得自己只能做到80分。Stephy說：「好客觀咁睇，就好似我從另一個人去睇自己，呢個女仔好易𠱁、唔識嬲人、好多嘢都唔計較。對住情人似湯圓，搓圓按扁都冇問題嘅，算係細心嘅女仔。但係做呢一行壓力好大，可能對住最親嘅人，啲脾氣就會發晒落對方身上。而且冇可能做到100分，因為都要有進步嘅空間。」
小方就嫌自己不夠浪漫，他說：「入咗行，真係冇時間做到100分嘅情人，我覺得兩個人相處，最重要係時間。有時間先可以一齊培養感情，我咁忙，實冇時間陪女友啦！而且我唔夠浪漫，好少做啲驚喜畀情人。情人節都係食吓飯，最近試過整心形牛扒。要浪漫都要時間先做到，要時間諗、又要有時間去做，所以最大問題係冇時間！」
今年的情人節，小方和Stephy均要在工作中度過，未必能有時間齊齊慶祝。小方則於當天練習跑步，他說：「我2月17日參加馬拉松，所以一定要練跑步。睇情況啦！或者嗰日去錄音室搵吓Stephy，因為佢錄嗰首係同我合唱嘅電影主題曲。」
話明拒絕收花
但小方覺得若要對情人好，每天也是情人節，他說：「其實又唔需要節日先慶祝嘅，情人節只係刺激經濟嘅日子，買花買禮物。同情人相處，最緊要對對方好，多啲時間陪佢，所以呢啲節日對我講唔係太重要。」
Stephy則說：「嗰日我要去錄歌，都好㗎！條街會好多人，真係可以避開晒。由細到大，我都唔渴望拎住花同情人行街，因為真係人頭湧湧。如果啲男仔話要送花，我實話唔要。」知道小方於當日探班後，Stephy說：「咁都好吖！可以一班人過情人節。」
做了藝人私人時間少，大時大節都不能放假，Stephy謂不會因此而不慶祝情人節，她說：「人唔可能只係工作，都要平衡吓，有時都要出去玩。」
場地提供：太古廣場
服裝提供：BreadnButter（鄧麗欣）、Chevignon（方力申）
髮型：VincePang@ILColpo
