淫照風暴女主角鍾欣桐前日首度現身向公眾交代，備受各界關注，無綫總經理陳志雲昨日力撐阿嬌，力邀她為周日《雪中送暖》籌款節目演出，而呂良偉則表示把事件當作反面教材，解釋給仔仔知道「啲姐姐、哥哥做錯事」。
呂良偉：教識仔仔
近期報紙日日都頭條，我個仔都問我，點解姐姐身上會有花（指紋身），我唔會收起啲報紙，反而會解釋畀佢聽，啲姐姐、哥哥做錯事。我覺得Edison應該返嚟，身為一個男人，要面對呢件事，佢令到好多人傷心，唔做都做咗喇，唔能夠交低餅帶（指自拍影片）就走咗去，呢啲係乜嘢所為？
農夫：仲有糧出
陳冠希公司力捧組合農夫被問到有否看過阿嬌記者會片段及聽過公司倒閉傳聞時，成員C君說：「好忙，冇睇記者會報道，公司接job就有聽過，𠵱家仲有糧出。」陸永則說：「陳冠希有自己決定，新年我哋有sendmessage畀佢，互相祝生意興隆。」
陳志雲：力邀演出
無綫會喺今個周日舉行節目《雪中送暖》，我哋都聯絡咗Twins、譚詠麟、容祖兒同陳奕迅等歌手演出，我親自聯絡英皇，希望爭取到疑似藝人淫照被公開以嚟，鍾欣桐首次公開表演，𠵱家等緊回覆。
佘詩曼：要向前看
阿嬌好勇敢，呢樣需要好大勇氣，我諗好多人都會支持佢哋，件事啱啱發生時我都有睇過幾張相，我唔鼓吹啲人繼續睇。相信阿嬌點處理，都唔可能得到全世界贊同，每個人都有過去，最重要係向前看。
張嘉兒：反面教材
阿嬌出嚟講番件事好勇敢，大家要支持佢，女仔要識得保護自己，今次件事都算係一個反面教材，要小心識男友。
採訪、攝影：林妃
