外表斯文的張敬軒，童年時卻仿似撒旦之子，除了詛咒母親安樂死，又暗地拉開母親的椅子，令母親做滾地葫蘆。長大後的軒仔事業有成，會否懂得孝順父母？他鬼馬地說：「會！繼續拉開佢張凳。」
張敬軒原來十分搗蛋，最愛駁嘴激得父母「生蝦咁跳」，他笑說：「我把口好大吉利是㗎，尤其細個反叛期，經常駁嘴。有年我哋要搬屋，好記得年三十晚搬晒啲嘢去新屋，阿媽好開心咁話安樂晒，新年有新屋住，跟住我咪話，『係呀，你好安樂，你安樂死㖭呀』激到阿媽好嬲，佢好似武松打虎咁，拎住對膠拖鞋追住我嚟打囉，打到我個嘴腫晒。」
「梗係打得勁啦」
軒仔還向難度挑戰，他興奮地說：「另外有一年，全家人一圍大枱坐晒喺度食團年飯，我趁阿媽起身夾餸，偷偷哋拉開佢張凳，佢中招坐落去，咪跌落地，咁梗係打得好勁啦！全家人幫我求情都冇用。」
雖然打打罵罵又一年，軒仔承認與母親的感情很好，現在媽媽為他打理內地的工作，軒仔會否更加孝順她？他說：「會，繼續拉開佢張凳囉！講笑啫，每年我都會同佢哋食飯過年，今年雖然我要做嘢，但三十晚就返去同佢哋食飯拜年。」
唔着內褲瞓覺
問軒仔過年會做甚麼？他說：「老竇係北京人，所以每年都會包餃子食，我間中都會跟佢一齊整，有啲人會買內衣褲過新年，但我又冇㗎，大年初一通常唔着嘅，咪着睡褲囉！」
採訪：王連連 攝影：仇志德
髮型：AaronKwokOfHairCulture
服裝提供：Bauhaus、React
場地提供：滬江大飯店
