演藝學院出身的蘇玉華，演技早已獲觀眾認同，但對蘇玉華而言卻仍嫌不足，為提升自己，她正計劃停工一年到外國進修，不過感情事就不用計劃，更揚言若mood到隨時嫁人。
在無綫近日播映的《和味濃情》中，蘇玉華飾演掛名「美女廚神」高柔美，為爭取演出機會，不惜阿諛奉承拍馬屁，卻從未想過努力學習廚藝充實自己。不過，現實中的蘇玉華，卻是剛剛相反，儘管她演技早已獲觀眾認同，但她仍覺得自己距離好戲之人有一段距離，為此，她有意停工一年到外國進修演技。
蘇玉華日前接受訪問時說：「我好想進修，讀書一路係自己心願，去外國大學、加入人哋劇團工作考察，一係唔去，一去就去一年，畢業後我做咗十幾年嘢，我覺得係時候充實自己，我希望多啲生活體驗，接觸多啲唔同嘅人，同埋吸收人哋嘅文化。」蘇玉華表示計劃在這一兩年內實行，但一切有待她完成手頭上工作再詳細考慮。
挑戰大膽舞台劇
停工到外國進修，是蘇玉華未來大計，而下月為香港藝術節舞台劇《改造情人》演出，將是她演技上一大挑戰，蘇玉華說：「自己好想做好，因為今次係自己演藝生涯一次破格演出，有好多好大膽嘅場面，畀觀眾睇到我另外一面。演舞台劇難度比拍劇高好多，對演員要求亦高好多，如果功力唔夠，觀眾一眼就睇到，唔係背好台詞或者個妝化得靚就足夠。」
事業上，蘇玉華力求突破，那麼感情生活又如何？可曾考慮與拍拖多年男友潘燦良拉埋天窗？蘇玉華笑道：「唔知㗎，唔排除呢個可能性，可能失驚無神mood到嘅話隨時發生。」
採訪：戴彩煥
攝影：陳志嵐
服裝：LEONARDPARIS、PINKO
髮型：RentonHung@salonidebyILColpo
場地：ZeffirinoRistorante（九龍富豪酒店）
