滙豐投資管理亞太區行政總裁區邦彥舊年中喺德國調嚟香港，接掌已過檔大摩、有「基金一哥」之稱嘅裴布雷空缺。噚日區邦彥喺獅子行宴請傳媒春茗，雖然佢之前一直喺歐洲做嘢，但就好識得入鄉隨俗喺新春大派利是，祝一班員工開工大吉。
不過，佢話初時只係預咗200封利是，結果唔夠派，睇怕出年就算準備定300封都未必夠。
咁又係，獅子行亞太區投資管理有700幾人，老細派利是喎，結咗婚都照𢭃啦。
最怕空氣差
身高超過6呎嘅區邦彥話，知道要調嚟香港，唯一擔心嘅係空氣質素，好彩污染情況冇佢想像中咁嚴重。不過，包括華華等一眾老記提佢，家吓係隆冬季節，政府嘅藍天行動成效有幾大，要遲啲春夏交替濕泅泅嘅日子先至見真章。