淫照風暴顯示「自拍新一代」閂埋門乜都做得出，嶺南大學希望力挽狂瀾，2012年實施「三三四」新學制時，學生必須修讀道德課程，校長陳玉樹話可以用法興銀行交易員虧空公款炒作做教材，至於近日全城熱話明星淫照風暴，佢認為係個別事件，呢啲嘢唔使教都知啱定錯，大學生應該識得分辨是非。陳校長又話，相信後生仔可以喺事件中學到嘢，就係電腦壞咗都唔好亂畀人修理，否則隨時私隱不保。
陳玉樹新任嶺大校長，由市區何文田搬入屯門藍地校長府，除咗好多典籍，原來仲搬咗大量《櫻桃小丸子》、《千與千尋》等日本漫畫去新居，校長唔係好似女星咁天真童心未泯，係陪個女一齊睇啫。做慣市區人，陳校長話最唔慣新界特別凍，要問同僚暫借暖爐取暖。