佘詩曼同王祖藍噚日喺藍田啓田商場出席「領匯戊子鼠年開市日」活動，雖然天寒地凍，個個都着厚衣出街，但阿佘就好勁，仍然愛靚唔愛命，堅持性感，着住條露晒膊嘅裙，唔通靚女真係冇咁怕凍？
明日14號係情人節，阿佘噚日出席活動時全程四萬咁口，睇怕佳人有約，感情有着落，但佢就否認有拖拍，仲話：「公司知我冇情人，所以安排我嗰日拍廣告，希望到時啲人唔好咁殘忍，會送花畀我，其實我希望搵錢多啲，感情隨緣啦，但我都想有個膊頭挨下，不過我𠵱家都有個新情人，就係一隻貓仔，啱啱新養兩個幾月大，好曳，抓到我隻手損晒。」
登台發新年財
阿佘啱啱喺美國登台返港，唱三場嘅酬金好豐厚，佢話：「好開心，今年過咗個肥年，啱啱喺美加登完台返港，媽咪都有一齊去玩，都有去賭場玩吓，發咗小小新年財，又收到曾志偉大利是，全程吃喝玩樂，今年鼠年有個好開始。」