踏入金鼠年，球壇可謂喜事重重，先有港聯自1992年後再奪賀歲盃，為本地波沖喜；到前晚扭開電視睇德甲大戰，又見到球彩台兩位行家宣佈喜訊──就係阿鵬趁球迷睇波party，跪地向女友Wendy求婚。
鑽戒玫瑰高唱《愛妳》
我求大俠縱橫球壇咁多年，都未試過睇波睇到有人求婚；唔好睇阿鵬平時聲大大、粗粗魯魯咁，今次呢件「盛事」，就見到佢花咗唔少心思；好似佢事先準備咗代表天長地久嘅99支玫瑰，以及求婚唔少得嘅鑽戒，再搵埋「歌臣」劉舜文幫手，喺眾多觀眾面前唱完許志安嘅《愛妳》後，再跪地求婚。單係呢份勇氣，已經令我求大俠動容；難怪阿鵬同Wendy兩位當事人都非常感動，幾乎淚流滿面㖭。
球迷羨慕Wendy撐阿鵬
可能後生女臉皮薄啲，就算當時全場起哄，猛咁嗌：嫁畀佢、嫁畀佢；有啲尷尬嘅Wendy，點都話要返屋企同阿媽商量一吓先，冇即刻應承阿鵬。如果唔係德能出嚟打圓場，相信癡心嘅阿鵬，肯定等到Wendy親口講「我願意」先肯起身。我求大俠問過阿鵬，佢就話今次揀公開場合求婚，係想表示佢嘅誠意，亦希望畀到驚喜女友，果然夠晒細心。
雖然呢一刻未知Wendy首肯未，不過喺佢嗰blog（ http://hk.myblog.yahoo.com/wendy-babe）入面，就見到好多球迷幫阿鵬打氣，希望Wendy快啲答允。而不少足球討論區，都有講到呢件球壇喜事，大部份球迷都撐阿鵬；唔少女球迷仲話咁樣求婚夠晒浪漫，好鬼羨慕Wendy㖭！
呢輪市面咁多負面新聞，男男女女搞到七國咁亂，我求大俠覺得，做乜都要諗諗先，千祈唔好因為「天真同儍」而行錯路；Wendy今年得26歲，遇上人生大事，梗係要同阿媽商量吓先。阿鵬咁愛你，呢啲嘢，佢實明嘅！