昨日港股假期完畢復市，紅盤冇高開，淡友食住外圍個勢㩒住好友嚟砌，完半場前好友追番啲，不過晏晝返嚟插得仲犀利，恒指最多跌過900點，收市都要跌853點。
農曆年第一個交易日，港股就咁慘淡低收，成交雖然唔算多，但係投資者嘅情緒已經變得好淡。
淡友明顯係有備而來，雖然好多股票都要跌，但係好明顯係主攻「六行三保」同地產股。
不過，暗湧唔喺呢度，而係跌返落110元樓下嘅滙控（005），睇個款淡友會質隻滙控落去104元，帶動個市下試21709上次嘅低位，呢個位好淡雙方會有惡鬥。
聯通C輪7858：聯通（762）昨收18元，跌到落20日線好似有啲支持，博反彈可以買啲C輪7858，昨收39仙，槓桿率4.6倍（有效2.7倍），正股升上19.8元，7858可見50仙，正股跌穿17元止蝕。