香港總商會百年女主席蔣麗莉，啱啱喺1月初提出休假，以求集中精神應付同廉記嗰單官司，由包立賢頂上做署理主席。總商會出版嘅《工商月刊》2月號，好自然有包立賢嘅訪問，但冇乜微言大義。反而總商會整咗一個《何時應與美元脫鈎》嘅專題報道。呢個咁敏感嘅問題，以前有立法會議員動議討論都搞到港元市場波動。唔通總商會唔驚？
華華當然要立即拜讀吓，之不過，睇完之後有啲失望，事關呢個專題報道，仍然停留喺各打八十大板嘅階段。既講聯滙好處，亦提聯滙壞處，既談掛鈎美金嘅合適性，亦講轉泊一籃子貨幣，以至單掛人民幣嘅可行性，最後都冇明確結論，唔知係唔係驚引嚟咩政治後果呢？如果係咁，不如唔好寫好過！