農曆新年長假期放完，先祝各位讀者步步高陞。長假期前忽遇上美股大跌市，港股難逃大跌命運，跌逾1300點過年，本來想買定多少貨博紅盤高開嘅，可能都會被嚇怕。由於假期幾日美股表現都唔多理想，故此估計今日復市恐未能紅盤高開，不過參考若干中資股的強勢表現，若低開或又有短炒機會。
光控不妨搭順風車
事實上，假前市場廣泛流傳中國政府會因應雪災而放寬宏調，甚至救市，該等措施應該還包括救股市。上海證券交易所於長假前向中國證監會上報《融資融券交易試點實施細則》，而中證監亦明確指出，今年將「適時」啓動券商融資融券業務試點。
所謂融資融券，即以「融資買股」的方式抵押證券進行孖展買賣，及以「融券沽空」方式進行沽空，據估計融資融券的實行可能會為市場帶來400億元左右新增資金，同時令市場交投轉活，預計能使市場交易量增加30%左右。孖展及沽空在香港越來越複雜的衍生工具市場當然小兒科，但在國內有機會令波動加劇，當局因而一再拖延實行融資融券。
假如融資融券短期落實試點，消息對國內證券股最為正面，光大控股（165）、申銀萬國（218）及第一上海（227）會是有機會炒作的股份，當中以光控較有睇頭，因有分拆概念，若見成交大增而炒上，不妨跟搭順風車。
新昌宜作中線投資
年初二維港煙花，好多人睇完就算，好少留意邊個贊助，今年花700萬銀嘅贊助商係觀瀾湖高爾夫球會及新昌營造（404），自從擁有內地眾多業務的朱樹豪以旗艦集團駿豪入主葉氏創辦多年的新昌後，暫時未見太大動作，贊助煙花算係最高調嘅動作。
駿豪管理層早前已表明不打算向新昌注資，故此新昌仍然係一隻建築股，未轉型做國內房產股，相信炒注資轉型會捉錯路，不過駿豪同新昌國內仍有不少合作機會，故買新昌宜耐性作中線投資而非短炒。