拜年手信，唔再只係藍罐曲奇或者花街朱古力，仲有俗稱手指嘅USB儲存器，入面咪係近日嘅女星相囉！年初二幾個姐夫每人攞住隻手指入房，出到嚟個個都話口亁要飲水喎（咦……？）。佢哋嫌電煲裏嘅水唔夠熱，開掣翻煲，但細佬阻止：「飲翻煲過嘅水，對身體有害㗎。」
呢個論點喺網上都幾多人講，我喺朋友之間都聽聞過。理由係水裏面通常都含有微量硝酸鹽及鉛等重金屬離子，當水翻煲時水份不斷蒸發，硝酸鹽、重金屬離子濃度相對增加，其中硝酸鹽進入人體腸胃後，會還原成亞硝酸鹽，破壞血液輸送氧氣嘅功能。
不過，中文大學生物化學系教授曹宏威直斥其非：「呢啲理論簡直係故佈疑陣。」
曹宏威話，一般清水唔應該有重金屬離子，至於微量硝酸鹽根本係普遍存在：「唔通唔呼吸咩！」佢仲話，翻煲清水並唔係煮中藥，唔係「四碗水煲埋一碗」，又點會增加濃度咁誇張喎！睇嚟，原來唔只娛樂新聞可以煲完再煲，清水都一樣得。
逢周一至周四刊出