大陸同胞用手機短訊拜年,比香港人更普及,內地《信息時報》報道,廣東移動全省客戶喺年三十當日,就發送超過7億條短訊,破咗舊年同日6.13億條嘅紀錄。華華估,SMS破紀錄應該同大陸雪災有關,因為外省民工返唔到家鄉過年,所以就狂發短訊同喺鄉下嘅鄉親父老拜年。
除咗廣東,據《上海青年報》報道,上海移動當日短訊量亦有6億條,喺最密集嘅夜晚7至8點一個鐘頭內,就有6554萬條,比上年多咗40%。至於《北京晨報》就話,北京移動年三十日手機用戶發咗5億條短訊,增長三成,加埋北京聯通嘅用戶發咗1億條共6億條,北京手機用戶約1600萬人計,平均每人發送38條短訊。
如果真係同雪災有關,咁電訊商講得上發咗筆雪災新年財,中國信息產業部估計,年三十到初六呢7日,全中國手機短訊發送量去到170億條新紀錄,用最平收費1毫子人仔計,內地兩家移動營運商夾埋,短訊收入超過17億人仔,仲唔係過肥年!