方力申的緋聞女友鍾欣桐（阿嬌）牽涉入疑似女星淫照風波，不過小方暫時把此事放在一旁，早前還特別學包餃子。談到新年願望，小方希望歌影事業兩得意，尤其是他與阿嬌合作拍攝的電影《出水芙蓉》將於暑假前上映，他渴望新片能有好成績。
方力申一直對媽媽炮製的餃子讚不絕口，但每次幫忙包餃子時卻大多穿皮收場，故方媽媽下令兒子只能幫手切肉切菜。為幫輕媽媽，小方特別向餃子師傅請教包餃子的秘訣。
出動自家醋
小方說：「我最鍾意食白菜豬肉餡，媽咪每次都包得大大隻，等我哋易啲飽。」他還提到方家的兩大吃餃傳統，他說：「屋企過年第一餐會食素，媽咪會包番茄蛋餃子，好好食，但就要花媽咪好多功夫。點餃子嘅醋又係我哋自己開嘅，仲會切好多蒜頭，邊食餃子邊食生蒜頭真係好過癮，不過好多朋友嚟屋企食飯都唔慣。」
提到新年願望，小方希望為北京奧運傳聖火，又期望跟阿嬌合作的電影《出水芙蓉》能有好成績，《出》片去年6月開始拍攝，8月煞科時小方還謂有點不捨得。
舉辦音樂會
小方說：「工作上希望歌影都有好成績，之前拍嘅《出水芙蓉》暑假前會上，仲有其他電影同埋新歌。下半年做多一隻新碟之後，應該會開個人音樂會，但係最希望都係有機會可以一家人去旅行，因為咁多年都未試過。」
採訪：藍文浩
攝影：陳慧安
髮型提供：VincePangofILColpo
服裝提供：Chevignon
場地提供：北方餃子源
