玄學家話我同老鼠合，同狗就唔多夾。最近真係俾隻狗激親。話說早前台北之旅回程去台北機場時，我喺西門町住嘅酒店訂「飛狗公司」巴士去機場，喺酒店附近上車。嗰日我搭夜晚8點機，諗住搭5點巴士，去到機場都係6點，仲可以去Starbucks隔籬嘅「維格烘焙」買鳳梨酥。
點知，喺攝氏9度低溫下，一個人企喺街頭由5點等到5點45分，幾乎喺台北街頭香消玉殞先見到架巴士，裙拉褲甩咁上到車，諗住6點半都趕到機場。巴士竟然半路停低，叫我哋攞晒啲行李落車，當時落起微微冷雨，原來巴士公司將唔同地區嘅乘客，載去一個大站，集齊人才改搭大巴！結果廿幾人面黑黑上車，7點幾先到機場，好彩我上網checkin咗，快啲搞掂手續上到機。
原來唔少同事大家都試過，阿清因為飛狗遲到焗住搭的士入機場，小魚話台灣朋友叫佢去台北車站搭國光巴士，準時好多。各位姊妹，記得對「飛狗」多啲戒心吖！
逢周一至周四刊出