Volkswagen上個月真係巴閉，講嘅唔係佢哋賣咗幾多部車，而係幾乎喺一日之內攞到三個國際性大獎，而且仲要同TSI引擎和DSG半自動波箱呢對拍檔有關㖭！
上月中喺慕尼黑舉行嘅德國汽車協會（ADAC）「2008YellowAngel」頒獎典禮中，號稱低耗油大馬力嘅TSI引擎，以及全新7前速DSG半自動波箱，就奪得「最先進及環保科技」嘅殊榮，可見呢對拍檔唔止得到車迷嘅支持，亦獲得車壇專業人士嘅認同。隔咗幾個小時，配用咗TSI引擎嘅Golf1.4TSI和Eos2.0TSI，又喺著名英國汽車雜誌《WhatCar?》嘅最佳汽車選舉中，分別奪得「最佳家庭小房車」同「最佳開篷車」大獎。前者能夠奪得有關獎項，係因為評審員一致認為佢喺道路上行駛時，可以為車上乘客及行李提供足夠空間同保護。後者就因為佢所用嘅嗰台2.0TSI引擎，可以有唔錯嘅性能表現之餘，全新五幅式電摺硬頂加埋獨特流線造型，都係佢可以贏得獎項嘅主因。
記者：鄭達基